Euskal artea euskaraz zergatik ez?
Eta zergatik ez euskararen inguruko euskal artea?
Erantzun ezberdinak eman dizkiete galdera horiei hainbat artistek, eta guk horietako hiru ekarri nahi izan ditugu Oihaneder Euskararen Etxea hartzen duen, Montehermoso kulturunera:
- Gorreri bisuala -Zaloa Ipiña-
Proiektu honetan euskara gaur egungo minorizazio egoeran egotera eraman duten arrazoi historikoei buruzko irakurketa bisualak egiten ditu Zaloa Ipiñak, eta baita hizkuntzak heriotzara eraman ditzaketen aspektu sozial eta soziolinguistikoei buruzkoak ere.
- Hitz birziklatuak – Zirika-
Alfredo Hernandezek urteak daramatza euskararekin eta naturak eskaintzen dizkion elementuekin poesia bisuala egiten, eta hori arte-lan
bihurtzen. Beti euskarri berrien bila koadroetatik, eskulturetara, eta
hemendik instalazioetara eraman ditu euskal hitzak, etengabe beraiekin
jolasean azken urteetan bideo-sorkuntza lanetara egin du jauzi.
Hitz birziklatuak Oihanederren otsailean zehar ikusgai egongo den erakusketa kolektiboaren proposamenerako beren-beregi egindako proiektua da.
- Abere ba, palindromo ilustratuen piztegia -Bigara-
Abere ba proiektuaren ardatza euskarazko palindromoak dira; ezker-eskuin zein eskuin-ezker testuak eduki berbera dutenak. Erakusketak irudi eta testuaren arteko oreka bilatuz, hainbat elementu elkarrekin harremanduta erakutsiko ditu 101 animalien izenak oinarri: aberearen izena eta alderantziz testu ispilu palindromikoa osatuz izenburu moduan.
Arte garaikidearen barruan euskaraz sortzearen inguruko gogoeta ezberdinek –kezkak, jolasak, dibertsioa, sentsazioak, gogoa, e.a.– osatzen dute ur-emari kolektibo hau.
Hiru hausnarketa artistiko, euskarazko hiru arte-proposamen, euskararen hiru arte-ur.
ORDUTEGIA:
Asteartetik ostiralera: 18:00–20:00
Larunbatetan: 12:00–14:00 / 18:00–20:00
Igandeetan eta jaiegunetan: 12:00–14:00
BABESLEA:
