Lurralde hotzak Iratxe Fresneda

ekaina
05
Asteazkena
19:00
Ortuño aretoa

Ekainari ereiaro ere deitzen omen zaio.

Oihanederren hilabete honetako egitarauari bestelako izaera eman nahi izan diogunez, izena ere aldatu diogu: Ereiaroa, ereiteko aroa, lurra prestatu ondoren hazia bertan barreiatu edo sartzeko garaia. Izan ere, haziak bezala barreiatu nahi ditugu ekain-ereiaro honetan euskal sortzaileen lanak Gasteizen.

Iratxe Fresneda zuzendariak emango dio hasiera Ereiaroari, bere bigarren film luzearekin: Lurralde hotzak (Cold lands).

Barren-barrenetik hasten den bidaia pertsonala da Lurralde hotzak. Begiratzeko modu bat da. Arnas egiteko bide bat.

Zer gertatzen da, baina, norbere joan-etorriek Theo Angelopoulos, Bego Vicario, Win Wenders edota Rut Hillarp zinemagileen begiekin topo egiten dutenean? Euskal Herrian hasi eta Eskandinavian barrena, lurralde hotzetan barna, norbere lorratzak poema bilakatzen dira.

Ez-fikziozko roadmovie honetan, sortzaileen ikuskera, irudien barruan ezkutatzen dena, erlezaintzaren, arkitekturaren eta pertsonen paisaiarekin batera uztartzen da.

Zinemagintzaren zinemagintza da Lurralde hotzak eta, begirada garaikidearekin berrikustean, zentzu berriak hartzen dituzten lekuak. Barrualdeko paisaietatik, eguzkiak erretakoak, iparraldeko argi urdinetik iraganda, filmak zinema-artxiboez hausnartzen du, haien iraunaldiaz eta kultura altxor moduan daukaten garrantziaz. Aldi berean, arkeologia zinematografikoari zentzu berria ematen dio, gaurko irudiekin elkarrekintzan kokatzean.

Zinemagintzak bere egiten dituen paisaietan, eremuz kanpokoek hartzen dituzten esanahietatik bidaia da Lurralde hotzak. Zinemagintza eta bizitza nahasten dira ikus-entzunezko artefaktu honetan, bizitzea artelana dela jakinik.

Fitxa teknikoa:
Zuzendaria eta gidoigilea: Iratxe Fresneda
Ekoizpena: Pimpi & Nella Films
Generoa: Sormenezko dokumentala
Argazkia: Iratxe Fresneda
Muntaketa: Raúl López
Soinu-ingeniaria: Joselu Rubio – REC Estudios
Zuzeneko soinua: Txelu Medina Arbide
Artea eta diseinua: Saioa Etxebarria, Raúl López
Webgunea: Saioa Etxebarria
Hizkuntzak: Euskara, frantsesa, ingelesa, alemana
Iraupena: 66 minutu
Kolorea: Kolorea eta zuri-beltza