Udaberria, primavera, xopan, chirawpacha, lolli, samakono, arbiǎ, mosme bahar, basanta nitu, che chelle, lapacPacha, om’bit, paŚnilaj, بهار, хавар, motowa, earrach, bosonto, 春天(tshun-thinn), 春季 (chun-gui / cun-gui), 봄 (bom), ilkyaz, kacanglahan, kaljavevean, sadingsing, samulayan, srnabaw, tngnganabaw…
Udaberria esateko hamaika modu dago munduan, hizkuntza adina modu! Oihanederren loreen urtaroa modu berezian ospatu nahi dugu eta horretarako udaberri jaia martxan da! Hizkuntza gutxituen lehen musika jaialdia!
Maiatzaren 23an Falerina lorategian hizkuntza desberdinetako musika egongo da entzungai, musika ona eta giro hobea! Iparraldetik etorritako Joxe Replay taldeak girotuko du bermuta 13etik aurrera eta bazkaltzeko òlha aranesa egongo da Hordago tabernan 5 €ren truke.
20etatik aurrera Okzitaniako Mauresca Fracas Dub eta Kataluniako Txarango taldeek dantzan jarriko gaituzte gauerdira bitartean.
Jaialdiaren testuinguruan GEU elkarteak Beltzean Mintzo Amerikako jatorrizko hizkuntzen arnasaz dokumentalaren emanaldia antolatu du maiatzaren 19an. Proiekzioaren ostean Garabideko Txema Abarrategirekin solasaldia egongo da, 19etatik aurrera Betolaza aretoan izango da.
Zatoz udaberri eleanitza ospatzera!
Jaialdia 2015/16 ikasturtean abiatuko den Hizkuntza Gutxituen zikloaren atarikoa da. Hilabetero hizkuntza bat aurkeztuko da: Tamazighta, galiziera, okzitaniera, asturiera, gaskoia, kashubiera… eta beste hainbat hizkuntzen egoera soziolingüistikoa eta erabilera eremua aztertu eta jatorrizko hiztunekin solasaldi eta tailerrak egingo dira. Hizkuntza horietan egindako musika, zinea eta bestelako eskaintza kulturala ere egongo da. Irailean osatuko dugu informazioa.
https://www.youtube.com/watch?v=880NhzDfCI8
