Ikasturte berri honetan Oihanederrera datorrenak kultura jasoko du opari

2021-09-24 / oihaneder

Udazkenean sartzearekin bat, Oihanederrek urtaro berriko egitaraua aurkeztu du. Ikasturte berria etxeko txikienek gogotsu hasten duten gisan, Oihanederren ere indarberrituta hasi dute urtaro aldaketa. Eta Oihanederrera hurbiltzen den edonorri kultura oparitzeko prest dira oraingoan ere. Udako egitarauak izandako harrera onarekin indarrak hartu, eta programazio oparoa izango da euskal kulturazaleen opari Oihanederren.

Urriaren 5etik aurrera eta abenduaren 23ra bitartean, mota askotako jarduerak antolatuko dira publiko ezberdin ugari euskal kulturara erakartzeko asmotan: kontzertuak, antzezlanak, ikastaroak, erakusketak, lehiaketak, familia jarduerak, ikuskizunak, filmak, deialdiak…

Urriaren lehen astean emango zaio hasiera denboraldi berri honi: Hirugarren emaztea filma vietnamdarra ikusteko aukera izango dute kulturzaleek (jatorrizko hizkuntzan, vietnamieraz, euskaraz azpititulatua). Aste berean Leire Etxezarreta arrasatearrak zabalduko du Egin Leku! deialdiko kontzertu sorta.

Aipatu behar da Oihanederren webgunea izango dela eguneratuta egongo dena behin betiko informazioarekin, gaur egun bizi dugun egoerak sortzen dituen azken orduko egokitzapenak bertan eguneratuko dira honenbestez. Aldi berean, jarduera bakoitzaren informazio xeheagoa datak heldu ahala jakinaraziko da.

Bestalde, ematen duenez pandemia honek eragindako neurrietara ohitzen joan beharko da Oihanederren ere, eta luzaroko kontua izango dira bai musukoa, bai aretoen edukiera mugatua. Beraz, udazkenean zehar indarrean jarritako neurri eta arau ezberdinekin jarraitzea ezinbestekoa izango da.

Honi lotuta, udazkeneko programazioko jarduerak doakoak izanik ere (Hezi-Ola ez beste guztiak), gonbidapena aurrez eskuratu beharko da ohiko moduak erabilita (oihaneder@oihaneder.eus helbidera idatzita, telefonoz eskatuta edota Bibe plataformaren bidez eskuratuta). Salbuespenak salbuespen, astebeteko aurrerapenaz jarriko dira gonbidapenak eskuragarri.