Gasteiztarrak Arraun The World 2019 Udako argazki-hizki lehiaketa

ekaina
21
Ostirala
00:01
iraila
21
Larunbata
23:59

Gasteiztarrak Arraun The World udako argazki-hizki lehiaketa martxan da bosgarren urtez. Nahi duen guztiak 2019ko udan munduan zehar eginiko bidaiak argazki eta hitzen bitartez kontatu ahal izango du. Parte hartzeko epea 2019ko ekainaren 21etik irailaren 21era bitartekoa izango da, biak barne. Lan onenen egileek Durangoko Azokaz gozatzeko asteburu pasa kulturala irabaziko dute. 

Aurreko lau edizioetako harrera onaren ostean Oihaneder Euskararen Etxeak eta Gauekoak Elkarteen Federazioak argazki-hizki lehiaketaren bosgarren edizioa antolatzea erabaki dute.

Orain arteko bideari jarraituz, parte hartzeko hogei argazkidun argazki-sorta aurkeztu behar da eta argazki-sortari eta argazki bakoitzari euskarazko izenburua jarri. Horrekin batera, egindako bidaiaren azalpen laburra bidali behar da oihaneder@oihaneder.eus helbidera (1500-2000 karaktere).

Horrekin batera, lehiakide bakoitzak sortako argazki bat aukeratu eta Facebook, Twitter edo Instagram-era igo beharko du, bere argazki sortaren izenburua zehaztuz. Igotzean #GasteiztarrakArraun traola erabili beharko du eta @oihaneder_etxea eta @gauekoak aipatu.

Gazteen parte hartzea sustatzeko bi adin kategoria ezarri dira; 18-30 urte bitartekoena eta 30 urtetik gorakoena. Argazki-hizki lehiaketara aurkeztutako lanen artean lau argazki-sorta sarituko dira, 250 € sorta bakoitzeko.  Kategoria bakoitzeko bi sari emango dira.

Saritutako lanen egileek abenduan Durangoko Euskal Liburu eta Diskaren Azokan asteburu pasa irabaziko dute: 2 pertsonentzako bi gautako egonaldia Durango ondoko Garaiko landetxean (150 €) eta azokan gastatzeko 100 €ko bonoa.

Udazkenean argazki-hizki lehiaketan saritutako lau argazki-sortekin erakusketa egingo da Oihaneder Euskararen Etxean. Pantaila digital batean lehiaketara aurkeztutako argazki guztiak ikusi ahal izango dira.

Horrekin batera, lau irabazleek aurkezpen publikoa prestatu beharko dute, egindako bidaia argazkien bitartez kontatzeko. Aurkezpenak Gasteizko lau auzo desberdinetan antolatuko dira, euskararen normalizazioan lan egiten duten GEU, Zizta eta Sarburu elkarteekin elkarlanean.

Lehiaketaren oinarriak: hemen

Lehiaketak Laboral Kutxaren laguntza du.

Gauekoak (r)ekin elkarlanean