21. KORRIKAk Gasteizen emango ditu azken kilometroak igandean. GEU, Oihaneder eta ALEAk elkarrekin egingo dugu korrika Salburuan. Aurten auzolanean sortutako milazangoarekin batera egingo dugu 2523. kilometroa, guztion urrats sendoekin euskarari bultzada emango diona.
Euskal Herrian zehar 2.560 kilometro egin ondoren, 21. KORRIKAk Gasteizen bukatuko du ibilbidea datorren igandean. Tradizioari jarraiki, GEU elkarteak, Arabako ALEAk eta Oihaneder Euskararen Etxeak batera egingo dugu korrika, 2523. kilometroan hain zuzen ere. Kilometro trabestiaren eskutik hartuko dugu lekukoa 10:46an Salburuako Joan Karlos I eta Stockholm kaleen arteko bidegurutzean eta “Gora gu ta gutarrak”eko lagunei pasako diete.
Guztion urrats sendoekin euskarari bultzada emango dion milazangoarekin batera egingo dugu kilometroa. Bi auzolanetan sortutako milazangoak kolorea, alaitasuna eta sinbologia erantsiko dio kilometroari. Salburuan hasita KORRIKAren azken kilometroak egingo ditu Andre Maria Zuriaren plazaraino.
Milazangoak abestia ere badu. Izan ere, martxoaren 31n korrika kulturalaren testuinguruan Oihanederren izandako “Enkarguz, sormenaren ibaian” ikuskizunean Andoni Egañak, Xabier Zabalak eta Alberto de Abajok kanta sortu zuten, publikoaren laguntzarekin. Horrela dio:
Milazangok euskarari bultzada emango
eskuz esku, zangoz zango KORRIKA arinago
Hegaztientzat ura guretzat aire
Salburuan euskara DUguLA KIDE
nirea zure eta zurea nire
kilometro beteko gozamen bide
Milazangok euskarari bultzada emango
eskuz esku, zangoz zango KORRIKA arinago
Nola txori kantuak hala ahoskerak
gure emozioak, oinatz, plazerak
bakoitzak egin bitza bere aukerak
bidezidorrak asko, irribarre bat
KORRIKAra batzeko elkartaratzea apirilaren 14an 10:30ean Joan Karlos I eta Stockholm kaleen arteko bidegurutzean izango da.Igandera arte!